పత్తికి మద్దతు ధర కల్పించాలి
ఏనుమాముల మార్కెట్‌లో ధరల తగ్గింపుపై విచారణ జరపాలి
వరికెల కిషన్ రావు
అక్షరదర్బార్, హనుమకొండ:
రైతులు పండించిన పత్తికి మద్దతు ధర కల్పించాల్సిన బాధ్యత మార్కెట్ అధికారులదేనని తెలంగాణ రైతు రక్షణ సమితి ఉమ్మడి వరంగల్ జిల్లా అధ్యక్షుడు వరికెల కిషన్ రావు అన్నారు. మంగళవారం సమితి నాయకులతో కలిసి ఏనుమాముల వ్యవసాయ మార్కెట్‌ను సందర్శించి పత్తి రైతుల సమస్యలను తెలుసుకున్నారు. అనంతరం మార్కెట్ కమిటీ కార్యదర్శి శ్రీనివాస్‌కు వినతిపత్రం అందజేశారు.ఇతర మార్కెట్లతో పోలిస్తే ఏనుమాములలో పత్తికి తక్కువ ధరలు లభించడంపై విచారణ జరిపించాలని కోరారు. బహిరంగ వేలం పారదర్శకంగా నిర్వహించి, వ్యాపారుల కుమ్మక్కు, ధరల నియంత్రణకు అడ్డుకట్ట వేయాలన్నారు. తేమశాతం, నాణ్యత పేరుతో రైతులకు అన్యాయం చేయకుండా నిబంధనల ప్రకారం పరీక్షలు నిర్వహించాలని సూచించారు. వర్షాభావంతో పత్తి దిగుబడులు తగ్గి పెట్టుబడులు కూడా తిరిగిరాని పరిస్థితుల్లో రైతులకు గిట్టుబాటు ధర కల్పించాలని డిమాండ్ చేశారు. కార్యక్రమంలో రైతు రక్షణ సమితి నాయకులు హింగే భాస్కర్, చౌళ్ల రామారావు, సురాబు బాబురావు, నాగుర్ల రాజీరు, భాషబోయిన కుమార్ యాదవ్ తదితరులు పాల్గొన్నారు.
.jpeg)
