బతుకమ్మ వేళా.. బిందెలతో బతుకు పోరాటం!
13వ వార్డులో నెల రోజులుగా నీటి కటకట..
కమిషనర్, కౌన్సిలర్‌ పట్టించుకోవడం లేదంటూ కాలనీవాసుల ఆగ్రహం
అక్షరదర్బార్,పరకాల:
తెలంగాణ సంస్కృతికి ప్రతీకగా నిలిచే సద్దుల బతుకమ్మ పండుగ వేళ పరకాల పట్టణంలోని 13వ వార్డు ఎస్సీ కొత్తవాడలో మహిళలకు నీటి కష్టాలు తప్పడం లేదు. నెల రోజులుగా నీటి సరఫరా లేకపోవడంతో తాగునీటి కోసం బిందెలు పట్టుకుని బోర్ల వద్దకు పరుగులు తీయాల్సి వస్తోందని స్థానిక మహిళలు ఆవేదన వ్యక్తం చేస్తున్నారు.పండుగ సందర్భంగా ఇళ్లకు వచ్చిన ఆడబిడ్డలు, బంధువులతో సందడిగా ఉండాల్సిన సమయంలో నీటి కోసం బిందెలు పట్టుకుని తిరగాల్సిన దుస్థితి నెలకొందని వాపోతున్నారు. నీటి సమస్యపై స్థానిక కౌన్సిలర్‌కు, మున్సిపల్‌ కమిషనర్‌కు సమాచారం ఇచ్చినా స్పందన లేదని కాలనీవాసులు ఆరోపిస్తున్నారు.
పండుగ పూట కూడా నీటి కష్టాలు తప్పడం లేదని, తమ సమస్యను పరిష్కరించడంలో అధికారులు, ప్రజాప్రతినిధులు నిర్లక్ష్యం చేస్తున్నారని స్థానికులు ఆవేదన వ్యక్తం చేస్తున్నారు. ఇప్పటికైనా మున్సిపల్‌ అధికారులు స్పందించి 13వ వార్డులో నీటి సరఫరాను పునరుద్ధరించి తమ ఇబ్బందులు తొలగించాలని మహిళలు కోరుతున్నారు.
.jpeg)
