గురుకులంలో ‘పాము’ కలకలం!
పాము నుండి తప్పించుకునే క్రమంలో గాయపడ్డ ఐదో తరగతి విద్యార్థిని..
పాములు, కోతుల సంచారంపై తల్లిదండ్రుల ఆందోళన
అక్షరదర్బార్, ఇనుగుర్తి: ఇనుగుర్తి సాంఘిక సంక్షేమ బాలికల గురుకుల పాఠశాలలో శుక్రవారం రాత్రి పాము కలకలం రేపింది. పాము నుంచి తప్పించుకునే క్రమంలో ఐదో తరగతి విద్యార్థిని ఎన్‌.అక్షయ కాలు బండరాయికి తగిలి స్వల్పంగా గాయపడింది. పాము కాటు వేసిందనే భయంతో విద్యార్థినులు, సిబ్బంది ఆందోళనకు గురయ్యారు. వైద్య సిబ్బంది పరీక్షించి పాము కాటు కాలేదని నిర్ధారించడంతో ఊపిరి పీల్చుకున్నారు.
పారిశుధ్య లోపాలపై ఆగ్రహం
పాఠశాల ఆవరణలో పిచ్చిమొక్కలు, కంపచెట్లు ఏపుగా పెరగడంతో పాములు, కోతులు సంచరిస్తున్నాయని తల్లిదండ్రులు ఆరోపిస్తున్నారు. వెంటనే కంపచెట్లను తొలగించి, తగిన విద్యుత్‌ దీపాలు ఏర్పాటు చేయడంతో పాటు సోలార్‌ ఫెన్సింగ్‌, సీసీ కెమెరాలు ఏర్పాటు చేసి విద్యార్థినుల భద్రతకు చర్యలు తీసుకోవాలని డిమాండ్‌ చేస్తున్నారు.
